2026 жылғы 28 қаңтарда Павлодар ауданының емханасы базасында «Қауіп тобына жататын балаларды ерте анықтау және сүйемелдеу жүйесіндегі ПМПК-ның рөлі» тақырыбында облыстық семинар өтті.
Іс-шараның мақсаты – қауіп тобына жататын балалардың дамуындағы бұзылыстарды ерте анықтау, олардың ерекше білім беру қажеттіліктерін бағалау, сондай-ақ баланың жеке даму маршрутын айқындау мәселелерін талқылау болды. Сонымен қатар қауіп тобына жататын балаларды анықтау және сүйемелдеу барысында білім беру, денсаулық сақтау және әлеуметтік қызметтер арасындағы ведомствоаралық өзара іс-қимылды нығайту мәселелеріне ерекше назар аударылды.
Семинар жұмысына арнайы білім беру ұйымдарының өкілдері, ОКППК жетекшісі Сүлейменова Б.К., Железин ауданының КППК педагог-психологы Шайкова Айкерым Кимадиденовна, Павлодар ауданы емханасының мамандары, білім бөлімінің өкілдері және басқа да мүдделі мамандар қатысты.
Семинар аясында «КППК жағдайында ерекше білім беру қажеттіліктері бар оқушыларды психологиялық-педагогикалық сүйемелдеуді ұйымдастыру» тақырыбында, педагог-психологпен бірлескен авторлықта дайындалған баяндама ұсынылды.
Баяндамада ерекше білім беру қажеттіліктері бар балаларды сүйемелдеудегі кешенді тәсіл, диагностика, кеңес беру және түзету жұмыстары барысында КППК мамандарының рөлі, сондай-ақ баланың жеке даму маршрутын тиімді құрудағы пәнаралық өзара іс-қимылдың маңыздылығы атап өтілді. Ерте араласу мен отбасына жүйелі қолдау көрсету балалардың табысты әлеуметтенуі мен білім алуындағы негізгі факторлар ретінде белгіленді.
Семинар қорытындысы бойынша қатысушылар мұндай іс-шаралардың мамандардың кәсіби құзыреттілігін арттырудағы және қауіп тобына жататын балаларды ерте анықтау мен сүйемелдеу жүйесін одан әрі дамытудағы маңыздылығын атап өтті.
